Visitors Book

೨೭.೯.೧೯೭೫
ನಾಡ ನುಡಿ, ನಾಡ ಜನ, ನಾಡ ಕಾರ್ಮಿಕರು, ಕೌಶಲ್ಯಪರಿಪೂರ್ಣರು, ಬುದ್ಧಿಜೀವರುಗಳ ಸುಗಮವನ್ನು ಸಂದರ್ಶಿಸುವ ಮಹಾಭಾಗ್ಯ ಈ ದಿನದಿಂದ ಆಯಿತು. ಸುಮಾರು ೫೦ ವರ್ಷಗಳ ಹಿಂದೆ ಈ ಪವಿತ್ರ ಸಂಘ ಮಹಾರಾಜರ ಅಮೃತಹಸ್ತದಿಂದ ಪ್ರಾರಂಭವಾಗಿ – ಬಂಗಾರದ ಉತ್ಸವಕ್ಕೆ ಪೂರ್ವಭಾವಿಯಾಗಿ ನಾನು ಬಂದೆ – ಅಚ್ಚುಕಟ್ಟಿನ ಕಟ್ಟುಪಾಡಿನ ಕೂಡಿ ಬಾಳುವ ಈ ನವೋದಯ ಸಂಘದ ಪತಿ ವಿಷಯವೂ ಶ್ಲಾಘನೀಯ, ಅವರ್ಣೇಯ, ಸೌಜನ್ಯತೆಯ ಆಗರದ ಈ ಕರ್ಮಭೂಮಿಗೆ ತನ್ನತನವನ್ನ ಪುರೋತತ್ವದ ಪೌರೋಹಿತ್ಯ ವಹಿಸಿಕೊಂಡಿರುವ ಪ್ರತಿಕಾರ್ಯಕರ್ತರಿಗೂ, ಸದಸ್ಯರಿಗೂ ಭುವನೇಶ್ವರಿ ಸರ್ವಶಕ್ತಿಯನ್ನು ಅನುಗ್ರಹಿಸಲಿ. ಆಶೀರ್ವದಿಸಲಿ.

ಇರುವ ಸದಸ್ಯರ ಬ್ಯಾಂಕು ಪ್ರಾರಂಭವಾಗಲಿ. ಅವರ ಹಣ ದೀನ ದಲಿತರ ದೇವರಾಗಲಿ – ತನ್ನ ಅವಸರಕ್ಕೆ ಅಕ್ಕರೆಯ ಸಹಾಯ ಇದರಿಂದಾಗಲಿ. ಒಂದು ರೂ, ಒಬ್ಬ ಸದಸ್ಯರ ಕಾಣಿಕೆ – ಮುಖ್ಯವಾಗಿ ಮಾಡುವಿರೆಂದು ನಂಬಿರುವೆ.

೧೩.೧೧.೭೫
ನಾನು ಬೊಂಬಾಯಿಗೆ ಬಂದು ಎರಡು ದಿನಗಳಾದವು. ಇಲ್ಲಿಗೆ ಈ ಸಂಜೆ ಬಂದ ಕೂಡಲೇ ಮೈಸೂರಿನಲ್ಲಿದ್ದಂತಾಯಿತು. ಕೂಡಲೇ ಮೈಸೂರಿನವನಾಗಿಬಿಟ್ಟೆ. ಇಲ್ಲಿಯ ಚಟುವಟಿಕೆಗಳನ್ನು ಕೇಳಿ ಬಹಳವಾಗಿ ಮೆಚ್ಚಿಕೊಂಡೆ, ಅದರಲ್ಲೂ ನಾಟಕ ಹಾಗೂ ಪ್ರಯೋಗಗಳ ಬಗ್ಯೆ ಇವರಿಗಿರುವ ಆಸಕ್ತಿ ನನ್ನನ್ನು ಮುಗ್ಧನನ್ನಾಗಿ ಮಾಡಿದೆ. ಇವರೊಡನೆ ಚರ್ಚಿಸಿದಾಗ, ಕೆಲವು ಅಂಶಗಳ ಬಗ್ಯೆ ನನ್ನನ್ನೂ ವಿಚಾರ ಮಾಡುವಂತೆ ಮಾಡಿದ್ದಾರೆ.ಅದಕ್ಕೆ ಇವರನ್ನು ಅಭಿವಂದಿಸುತ್ತೇನೆ. ಒಳ್ಳೆ ಊಟ ಹಾಕಿದ್ದಕ್ಕೆ ಮತ್ತೊಮ್ಮೆ ವಂದಿಸುತ್ತೇನೆ.

೯.೧.೧೯೮೪
ಮೈಸೂರು ಅಸೋಸಿಯೇಷನ್ ಆಶ್ರಯದಲ್ಲಿ ಮೂರು ಉಪನ್ಯಾಸಗಳನ್ನು ಮಾಡಲು ಬಂದ ನಾನು ಇಲ್ಲಿಯ ಹೃದನ್ವಾದ ಪ್ರೀತಿ, ಆದರ, ಸ್ನೇಹಗಳನ್ನು ಸಂಪಾದಿಸಿ, ಹೆಮ್ಮೆಚಿತ್ತನಾಗಿ ಮರಳುತ್ತಿದ್ದೇನೆ. ಅವರೆಲ್ಲರಿಗೂ ನನ್ನ ಕೃತಜ್ಞತೆಗಳು.

೨೪.೧೦.೧೯೭೬
I am very happy to hear that this association taking keen interest in sports and cultural activities. I wish them all success

೧೯.೩.೧೯೮೬

ವೆಂಕಣ್ಣಯ್ಯ ಜನ್ಮ ಶತಮಾನೋತ್ಸವ ಉಪನ್ಯಾಸ ಸಂಬಂಧದಲ್ಲಿ ಮೈಸೂರು ಅಸೋಸಿಯೇಷನ್ನಿಗೆ ಭೇಟಿ ಕೊಟ್ಟದ್ದು, ಉಪನ್ಯಾಸ ಮಾಡಿದ್ದು, ಸೊಗಸಾದ ಮೈಸೂರು ರುಚಿಯ ಊಟ ಮಾಡಿದ್ದು, ಬದುಕಿನ ಮರೆಯಲಾಗದ ನೆನಪುಗಳಲ್ಲಿ ಒಂದಾಗಿ ಉಳಿಯುತ್ತದೆ.

೨೭-೧೨-೭೮
ಮುಂಬಯಿಯಲ್ಲಿರುವ ಈ ಮೈಸೂರು ಸಂಘಕ್ಕೆ ಈ ದಿನ ಸಂಜೆ ಸಂದರ್ಶಿಸಿ ತುಂಬ ಸಂತೋಷಪಟ್ಟಿದ್ದೇನೆ. ಇಲ್ಲಿಯ ಸದಸ್ಯರು ಕಳೆದ ಅರ್ಧ ಶತಮಾನದಿಂದ ಮುಂಬಯಿಯಲ್ಲ್ಲಿ ಕನ್ನಡದ ವಾತಾವರಣ ಅಳಿಯದಂತೆ ಉಳಿಸಿಕೊಂಡು ಬಂದಿರುವ ಸಂಗತಿ ಅಭಿನಂದನೀಯವಾಗಿರುವಂತೆ ಸ್ಮರಣೀಯವೂ ಆಗಿದೆ. ತನ್ನ ಹಿಂದಿನ ಪರಂಪರೆಯನ್ನು ಅವಿಚ್ಛಿನ್ನವಾಗಿ ಮುಂದುವರಿಸಿಕೊಂಡು ಹೋಗಲು ಈಗಿನ ಸದಸ್ಯರೂ ಪ್ರಾಂಜಲವಾಗಿ ಪ್ರಯತ್ನಿಸುತ್ತಿರುವುದು ಹರ್ಷದ ಮಾತು. ಸಾಹಿತ್ಯ, ಸಂಸ್ಕೃತಿ, ಕಲೆ- ನಾಟಕ, ವಿವಿಧ ಆಟಗಳು, ಹೀಗೆ ಬದುಕಿಗೆ ಬೇಕಾದ ಎಲ್ಲ ಅಂಗ – ರಂಗಗಳ ವಿಕಸನಕ್ಕೆ ತಕ್ಕ ಭೂಮಿಕೆ-ವೇದಿಕೆ ಒದಗಿಸಿ ಈ ಸಂಸ್ಥೆ ಮಾಡಿರುವ, ಮಾಡುತ್ತಿರುವ ಮಹದುಪಕಾರ ಚಿರಸ್ಮರಣೀಯ

೧೯.೩.೧೯೯೫

ಮುಂಬಯಿ ಮಹಾನಗರದಲ್ಲಿ ಕಳೆದ ಐವತ್ತು ವರ್ಷಗಳಿಂದ ಸ್ವತಂತ್ರ ಅಸ್ತಿತ್ವವನ್ನುಳ್ಳ “ಮೈಸೂರು ಅಸೋಸಿಯೇಷನ್ ಎಂಬ ಈ ಸಾಂಸ್ಕೃತಿಕ ಸಂಸ್ಥೆಯು ತನ್ನ ಬಂಗಾರದ ಹಬ್ಬವನ್ನು ಆಚರಿಸುತ್ತಿರುವ ಸಂದರ್ಭದಲ್ಲಿ ನಾನು, ಅದರ ಆಶ್ರಯದಲ್ಲಿ ಕುವೆಂಪು ಸಾಹಿತ್ಯವನ್ನು ಕುರಿತು ಈ ಎರಡು ದಿನಗಳ ಕಾಲ ವಿಶೇಷೋಪನ್ಯಾಸ ಮಾಡುವ ನೆಪದಲ್ಲಿ, ಇದರ ಕಾರ್ಯೋದ್ದೇಶಗಳನ್ನು ಕಂಡು ತುಂಬ ಸಂತೋಷಪಟ್ಟಿದ್ದೇನೆ. ಮುಂಬೈದಂಥ ಕನ್ನಡೇತರ ಪರಿಸರದಲ್ಲಿ, ಈ ನಗರದ ಹಾಗೂ ಹೊರಗಿನ ಕನ್ನಡಿಗರನ್ನು ಒಂದೆಡೆ ಕೂಡಿಸುವ ಆಯಸ್ಕಾಂತ ಕೇಂದ್ರದಂತೆ ವರ್ತಿಸುತ್ತ, ’ಎಲ್ಲಾದರು ಇರು ಎಂತಾದರು ಇರು ಎಂದೆಂದಿಗು ನೀ ಕನ್ನಡವಾಗಿರು’ ಎಂಬ ಕುವೆಂಪುವಾಣಿಯನ್ನು ನಿಜಮಾಡುತ್ತ, ನೆಲೆನಿಂತ ಈ ಸಂಘದ ಸಾಂಸ್ಕೃತಿಕ ಮಹತ್ವವನ್ನು , ಎಷ್ಟು ಅಭಿನಂದಿಸಿದರೂ ಕಡಿಮೆಯೆಂದೇ ತಿಳಿದಿದ್ದೇನೆ.

೬.೪.೭೮
ನಿಮ್ಮ ವಿಶ್ವಾಸಕ್ಕೆ ......

ನಮ್ಮ ಮೈಸೂರು ಸಂಘ ಚಿರಾಯುವಾಗಿ ಬೆಳಗಲಿ.

೨೨.೩.೧೯೮೬

ಮೈಸೂರು ಅಸೋಸಿಯೇಷನ್ ಹೆಸರು ಕೇಳಿದ್ದೆ. ಅದು ನಡೆಸುತ್ತಿರುವ ವ್ಯಾಪಕವೂ ಆಕರ್ಷದಾಯಕವೂ ಆದ ಕಾರ್ಯಕ್ರಮಗಳ ಬಗ್ಯೆ ತಿಳಿದುಕೊಂಡಿದ್ದೆ. ಈ ಎರಡು ದಿನಗಳು ನಾನೇ ಪ್ರತ್ಯಕ್ಷವಾಗಿ ಕಂಡು ಪುಳಕಗೊಂಡಿದ್ದೇನೆ. ಇಲ್ಲಿ ಕನ್ನಡ ಗೆದ್ದಿದೆ. ಕರ್ನಾಟಕದ ಕಂಪು ಪರಿಮಾಸುತ್ತಿದೆ. ಇಲ್ಲಿಯ ಕಾರ್ಯಕರ್ತರು ನಿಜಕ್ಕೂ ಅಭಿನಂದನಾರ್ಹರು. ಇಲ್ಲಿಯ ಯುವಕರ ಉತ್ಸಾಹ ಅಸದೃಶವಾದದ್ದೆಂಬುದನ್ನು ನಾನು ಅರಿತುಕೊಂಡಿದ್ದೇನೆ. ಅವರ ಉತ್ಸಾಹವೇ ಈ ಸಂಸ್ಥೆಯ ಜೀವಾಳವಾಗಿದೆ.

ಈ ಸಂಸ್ಥೆಯ ಇತಿಹಾಸವನ್ನು ಕೂಲಂಕುಷವಾಗಿ ಬರೆಯಿಸಿ, ದೇಶದಲ್ಲೆಲ್ಲಾ ಅದು ತಿಳಿಯುವಂತಾಗಲೆಂದು ಹಾರೈಸುತ್ತೇನೆ.